Alþýðusamband Íslands styrkir jólaaðstoð Hjálparstarfs kirkjunnar fyrir þessi jól um 800 þúsund krónur. Innanlandshjálpin hefur undanfarin ár verið með því sniði að skjólstæðingarnir fá gjafakort svo þeir geti valið sinn mat sjálfir. Þetta eru fyrirfram greidd debet/kreditkort á kennitölu Hjálparstarfsins sem fólk fær afhent. Kortin er hægt að nota í matvöruverslunum um land allt.
Skjólstæðingar Hjálparstarfs kirkjunnar hafa tekið þessari breytingu afskaplega vel og telja að sér sýnd meiri virðing á þennan hátt. Þessi aðferð til að aðstoða þá sem standa höllum fæti hefur vakið athygli erlendis og m.a. hlotið evrópska viðurkenningu.
Hjálparstarf kirkjunnar aðstoðaði ríflega fjögur þúsund manns vítt og breitt um landið í fyrra, mest fjölskyldur, og er búist við að fjöldinn verði svipaður í ár.
Á meðfylgjandi mynd eru Bjarni Gíslason framkvæmdastjóri Hjálparstarfs kirkjunnar og Drífa Snædal forseti ASÍ.
