ASÍ styrkir Samhjálp um 400 þúsund krónur nú í aðdraganda páskanna en Samhjálp hefur boðið upp á sérstakar hátíðarmáltíðir til handa þeim sem þangað leita yfir páskahátíðina.
Samhjálp hefur í meira en hálfa öld veitt aðstoð jaðarsettum hópum sem búa við fátækt og félagslega einangrun. Oft er þetta fólk að glíma við afleiðingar langvarandi fíknivanda.
Á Kaffistofu Samhjálpar í Borgartúni er boðið upp á máltíðir tvisvar á dag – morgunverð og heitan hádegismat – fyrir þá sem þurfa mest á því að halda. Allt að 250 máltíðir eru úbúnar dag hvern og mikið lagt upp úr því að tryggja öllum sem þangað leita staðgóða næringu á hverjum einasta degi. Á hátíðum eins og jólum og páskum er svo boðið upp á sérstakar hátíðarmáltíðir. Kaffistofa Samhjálpar er eina úrræðið sinnar tegundar sem er opið alla daga ársins.
Ljóst er að styrkurinn kemst í góðar þarfir nú um páskana.
