Jólabækur ódýrastar í Bónus – en stundum mun dýrari
Bækur sem seldar eru í Bónus eru ódýrastar í 95% tilfella samkvæmt úttekt verðlagseftirlitsins 3. desember síðastliðinn. Litlu munaði á verði Bónus og Nettó, en Bónus var ódýrara í 117 af 120 samanburðum milli þeirra tveggja. Langoftast munaði undir 10kr, en í fjórum tilfellum yfir 1.000kr.
Óvenju breitt verðbil var á fjórum bókum
- Þú sem ert á jörðu var 53% dýrari í Bónus en í Nettó (1.592kr munur)
- Hræðilegt hús var 47% dýrari í Nettó en í Bónus (1.601kr munur)
- Hræðileg veisla var 39% dýrari í Nettó en í Bónus (1.410kr munur)
- Skrifað í sand var 30% dýrari í Bónus en í Nettó (1.491kr munur)
Miklu getur munað á verði bóka og því getur verið gagnlegt fyrir neytendur að gera samanburð áður en verslað er. Bókin Jólakötturinn var í boði hjá Bóksölu stúdenta á 1.090kr, en hún kostaði rúmlega þrefalt meira í Bónus (3.559kr) og rúmlega fjórfalt meira í Eymundsson (4.999kr). Þetta er þó undantekning. Að meðaltali var Bóksalan 26% dýrari en Bónus. Nettó var að meðaltali 0,7% dýrara, Hagkaup 23%, Forlagið 30% og Eymundsson 37%.
Í krónum og aurum þýðir þetta að meðalbók sem kostar 4.000kr í Bónus kostar
- 28kr meira í Nettó,
- 920kr meira í Hagkaup,
- 1.040kr meira í Bóksölu Stúdenta,
- 1.200kr í Forlaginu,
- 1.480kr meira í Eymundsson.
Alls var 431 bók í samanburðinum, en valdar voru bækur sem finna mátti í minnst fjórum verslunum. Úrval bóka er að sjálfsögðu mun víðara hjá sérvöruverslununum en í lágvöruverðsverslunum ekki er lagt mat á þjónustustig í könnunum verðlagseftirlitsins.
Verð ýmist skríða eða stökkva
Líkt og í fyrra hnikast verð á bókum í Bónus og Nettó til frá degi til dags. Oft munar þar lágum upphæðum, þar sem keppt er krónu fyrir krónu um að bjóða lægsta verð. Þó ekki alltaf. Til dæmis lækkaði Útkall – ég er á lífi um tæpar 500kr, eða 8%, í Bónus milli 1. og 3. desember. Dýrin undir ljósadýrðinni hækkuðu hins vegar um 1.200kr, eða 35%, milli 20. nóvember og 1. desember.
Allt að 74% verðmunur á barnabókum
Þegar skoðaðar eru barnabækur úr Bókatíðindum ársins sést að verðmunurinn er nokkru skarpari. Eymundsson er með dýrustu barnabækurnar, að meðaltali um 41% dýrari en þar sem þær eru ódýrastar, sem er iðulega í Bónus.
Bóksala stúdenta er í þessum flokki ódýrari en Hagkaup í 23 af 33 tilfellum. Að meðaltali munar um 7%, eða 300kr, á verslununum tveimur.
Breiðast var verðbilið meðal barnabóka á Hetjurnar á HM 2026, sem kostaði 3.449kr í Bónus. Annars staðar kostaði hún:
- 3.458kr í Nettó (0,3% dýrari)
- 4.990kr í Forlaginu (45% dýrari)
- 4.995kr í Bóksölu stúdenta (45% dýrari)
- 5.299kr í Hagkaup (54% dýrari)
- 5.999kr í Eymundsson (74% dýrari)
Bókin Liverpool – Nýr þjálfari, nýtt lið, nýir sigrar! hafði næstbreiðasta verðbilið. Hún kostaði það sama og Hetjurnar á HM 2026 í öllum verslunum nema Bónus, þar sem hún var sex krónum dýrari (3.455kr).
Í samanburði á barnabókum voru skoðaðar þær 35 bækur sem voru merktar í Bókatíðindum sem barnabækur og sem fundust í minnst fjórum verslunum.
Aðferðafræði Skoðað var verð á bókum í verslunum Bónus í Smáratorgi, Nettó í Mjódd og Hagkaup í Smáralind og í vefverslunum Hagkaup, Bóksölu stúdenta, Forlagsins og Eymundsson þann 3. desember.
