Úthlutað hefur verið úr Minningarsjóði Eðvarðs Sigurðssonar og eru veittir fimm styrkir að þessu sinni. Þeir eru eftirfarandi:
Haukur Már Haraldsson, í forsvari f. Prentsögusetur, fær 500.000 kr til verkefnisins „Hönnun og uppsetning sýningar um sögu prentverks og bókagerðar á Íslandi 1535-1850“. Verkefnið felst í hönnun og uppsetningu sýningar um sögu prentverks og bókagerðar á Íslandi frá 1535 til miðrar nítjándu aldar. Sýningin verður sett upp í Gestastofu Skálholts, þar sem verða til sýnis verkfæri og prentgripir frá þeim stöðum sem prentað var fyrstu 300 árin. Þeir voru reyndar ekki margir, enda má segja að obbann af þessu tímabili hafi aðeins verið ein prentsmiðja í landinu, ýmist að Hólum eða Skálholti, rekin af þessum Biskupsstöðum eftir áhuga sitjandi biskups hverju sinni. Óhætt er að fullyrða að íslenskir bókagerðarmenn setjarar, prentarar og bókbindarar hafi verið leiðandi í kjarabaráttu íslenskra launamanna. Sýningin á að sýna þann jarðveg sem frumherjarnir eru sprottnir úr.
A. Hildur Hákonardóttir, f.h. Starfshóps Rauðsokka, fær 500.000 kr til verkefnisins „Rauðsokkar – verkalýðshreyfingin – kvennafríið 1975“ Verkefnið felst í að safna saman efni og skrá og miðla aðkomu Verkalýðsfélaganna að Kvennafríinu 1975, þeim tímamótandi viðburði. Þetta er einn stærsti þátturinn í viðamikilli skráningu og miðlun Rauðsokka á starfi sínu á áttunda áratug síðustu aldar. Afraksturinn verður í formi vefsíðu um Rauðsokkahreyfinguna þar sem frumheimildir verða gefnar út í stafrænu formi. Grunnskráningu skal lokið fyrir október 2021. Rannsókn, skráningarvinna og úrvinnsla fer fram í samvinnu við Kvennasögusafn Íslands á Landsbókasafni og þar verða gögnin geymd. Kvennasögusafn og Landsbókasafn tryggja að vefurinn lifi um ókomna tíð og verður hluti af stafrænum gagnasöfnum sem Landsbókasafnið starfrækir, á borð við tímarit.is og bækur.is.
Dr. Árelía Eydís Guðmundsdóttir, ásamt Dr. Svölu Guðmundsdóttur og Herdísi Pálu Pálsdóttur, fær 250.000 kr. til rannsókna á vinnumarkaðstengslum til framtíðar, gigg-væðingu og breyttum ráðningarsamböndum. Miklar breytingar hafa orðið á vinnumarkaði undanfarið. Færa má rök fyrir því að heimsfaraldurinn hafi hraðað breytingum á vinnulagi, störfum og starfsumhverfi og fjölbreyttum ráðningarsamböndum. Því er nauðsynlegt að byggja undir frekari rannsóknir á vinnumarkaðstengslum til framtíðar. Samkvæmt rannsóknum er helsti vöxtur í störfum í Bandaríkjunum og Bretlandi í svokölluðum gigg-störfum (afmörkuð og tímabundin verkefni sem leyst eru af fólki sem ekki er í hefðbundnu ráðningarsambandi). Á Íslandi er skortur á þekkingu á framtíðarvinnumarkaði og leitast umsækjendur við að bæta það, með viðurkenndum rannsóknaraðferðum, fókusgrúppum og megindlegum spurningakönnunum.
Útkoman úr rannsókninni verður m.a. birt í fræðilegum skrifum og í bók sem ætluð er fólki á íslenskum vinnumarkaði.
Dr. Katrín Ólafsdóttir fær 250.000 kr. til rannsóknarverkefnisins „Konur og karlar á vinnumarkaði: Hver vinnur og hver tapar?“. Verkefnið Konur og karlar á vinnumarkaði og þróun atvinnugreina á Nordurlöndunum: Hver vinnur og hver tapar? er hluti af samnorræna rannsóknarverkefninu Gendered labor markets and occupational change in the Nordics: Who wins and who loses? Verkefninu er ætlað að varpa ljósi á þróun atvinnugreina frá 2012-2019. Víða um heim eru merki um að hlutfall hálaunastarfa fari hækkandi á meðan að hlutfall starfa í miðju launadreifingarinnar hafi minnkað. Meðal láglaunastarfa hefur ýmist komið fram hlutfallslega fækkun starfa eða hlutfallslega fjölgun starfa. Því hefur ýmist verið talað um skautun á vinnumarkaði (polarization) eða „upskilling“. Á Norðurlöndunum eru vísbendingar um að hvort tveggja hafi átt sér stað, eftir löndum, en þessi þróun hefur ekki verið rannsökuð hér á landi. Jafnframt mun rannsóknin bera saman þróun á almennum vinnumarkaði og opinberum og bera saman þróun kynjasamsetningar í einstökum atvinnugreinum.
Jóna Sigurlaug Friðriksdóttir fær 42.000 kr. til ritunar á ágripi um ævi og störf Jóns Ingimarssonar, formanns Iðju félags verksmiðjufólks. Verkefnið er unnið fyrir Iðnaðarsafnið á Akureyri. Safninu barst stytta af Jóni að gjöf. Við styttuna er æskilegt að hafa aðgengilegar upplýsingar um Jón og áratugalanga baráttu hans fyrir verkalýðinn. Verkefnið felst í heimildaöflun og munu börn Jóns verða umsækjanda innan handar í þeim efnum. Miðað er við að samantektin verði sem nemur einni A4 blaðsíðu.
Minningarsjóður Eðvarðs Sigurðssonar var stofnaður árið 1983 til minningar um Eðvarð Sigurðsson, formann Verkamannafélagsins Dagsbrúnar. Sjóðurinn er í umsjá Alþýðusambands Íslands. Sjóðurinn veitir styrki til að efla rannsóknir og útgáfu á verkum sem varða sérstaklega vinnumarkaðinn, hagsmuni launafólks og starfsemi verkalýðshreyfingarinnar.
