Stærstu fjórar matvörukeðjur landsins lækkuðu verð milli ágústbyrjunar og ágústloka. Bónus lækkaði verð á 19% þeirra vara sem til skoðunar voru, Krónan og Nettó 9% og Hagkaup 3%. Verð voru athuguð dagana fram að 11. ágúst og dagana fram að 29. ágúst.
Þessu til viðbótar hófust heilsudagar í Nettó í lok samanburðartímabilsins og fór hlutfall vara á lægra verði í þeirri keðju upp í 32% þegar þeir hófust.
Þótt Bónus hafi lækkað verð á flestum vörum hefur meðalverð þar lækkað minnst af þessum fjórum verslunum, eða um 0,3. Nettó hefur lækkað mest, eða um 0,8 (og um 6,1% eftir byrjun afsláttardaga) þegar allar verðbreytingar í samanburðinum voru skoðaðar. Þetta skýrist að hluta af krónu-fyrir-krónu verðstríði við Prís í t.d. mjólkur- og kjötvörum.
Víðtæk lækkun
Ekki er um afmarkaða lækkun að ræða. Vörur í öllum flokkum allra fjögurra verslana lækka. Eini flokkurinn sem var rétt yfir núlli var flokkurinn kjöt og fiskur í Nettó áður en heilsudagar hófust, en hann hafði hækkað um 0,3%. Eftir upphaf heilsudaga var sá flokkur líka kominn undir núll, í 0,3% lækkun.
Prís-áhrifin
Tímabilið sem um ræðir fangar opnun hinnar nýju lágvöruverslunar Prís. Milli opnunardagsins 17. ágúst og 5. september hefur verð þar lækkað á 264 vörum (15% af úrvalinu sem til skoðunar var) og hækkað á aðeins 6 vörum, eða 0,3% af þeim sem skoðaðar voru.
Prís er enn ódýrasta matvöruverslunin í samanburði verðlagseftirlitsins. Af 340 vörum sem finna mátti í Bónus, Krónunni og Prís þann 5. september voru 97% á lægsta verðinu í Prís. Í Bónus voru 7% á lægsta verðinu og í Krónunni ein vara – Kjarnafæðis-bratwurst sem kostaði 612 krónur, eins og í Bónus. Í Prís kostaði varan 613 krónur og í Nettó 614 krónur.
Munurinn var ekki alltaf svo tæpur. Meira en fjórða hver vara var yfir 5% ódýrari í Prís en í Bónus. Tíunda hver vara var meira en 10% ódýrari og ein var á hálfvirði miðað við Bónus; Goða skinkubunki. Lista yfir vörur með stærsta verðmuninn fylgir fréttinni.
Jafnari dreifing verslana
Verðsamanburður í matvöru staðfestir að Prís er ódýrasta verslunin, en verð þar er 1,4% frá lægsta verði að meðaltali. Sambærileg tala í Bónus er 3,4% og í Krónunni 5,7%. Efst trónir 10-11, en þar er verð 81% frá lægsta verði að meðaltali.
Vísitalan heldur áfram að lækka
Líkt og verðlagseftirlitið benti á í ágúst var verðlag þann mánuðinn tekið að lækka, en mánaðarlækkun matvöruverðlags nam þá 0,2%. Þegar allur mánuðurinn er talinn lækkaði verðlag á matvöru um 0,5% milli júlí og ágúst.
Hér má sjá mánaðarlegar verðlagsbreytingar stærstu verslana
Viðauki: Vörur þar sem mestu munar á Bónus og Prís
Aðferðafræði
Verðlagsbreytingar eru reiknaðar með vigtun vöruflokka og verslana. Þegar talað er um breytingu á verðlagi er um að ræða veginn útreikning, en breyting á verði merkir stakan samanburð eða óvegið meðaltal.
Þegar verðlagsþróun er reiknuð er skoðað meðalverð sérhverrar vöru yfir mánuðinn (eða 6-13. mars þegar borið er saman við undirritun kjarasamninga) og borið saman við meðalverð mánuðarins á undan. Breytingar eru svo vegnar útfrá mikilvægi vöruflokka. Fjöldi samanburða í hverjum mánuði er um eða yfir 20.000.
Verðsamanburðurinn fyrir ágúst var framkvæmdur milli 9.-11. ágúst og 27.-29. ágúst.
