Verðlag í Extra hækkaði í júlí um tæp 7%, sem er afar mikil hækkun á einum mánuði í einstakri verslun. Verslunin er hluti af samruna Samkaupa og rekstraraðila Prís, Heimkaupa og Extra. Samkaup reka Nettó, Iceland, Krambúðina og Kjörbúðina. Er þetta fyrsta stóra breytingin á umræddum verslunum sem verðlagseftirlitið hefur séð eftir að samruninn gekk í gegn.
Vöruúrval Extra hefur einnig tekið stakkaskiptum. Helmingur vöruúrvalsins datt út milli mánaða og tæplega 400 vörur bættust við sem ekki höfðu verið í boði áður. Alls eru um 2.000 vörur í boði hjá Extra samkvæmt athugun verðlagseftirlitsins. Vörurnar sem bættust við eru að miklu leyti vörur sem finna mátti í verslunum Samkaupa.
Nýjar vörur dýrari en þær sem fyrir voru
Nýju vörurnar eru að meðaltali dýrari en þær sem fyrir voru. Þegar vörur eru skoðaðar sem voru í Extra fyrir, þá voru þær til dæmis að meðaltali 29% dýrari en í Bónus. Þegar aðeins þær vörur eru skoðaðar sem bættust við í júlí, þá voru þær að meðaltali 44% dýrari en í Bónus. Bilið var minna í öðrum verslunum, en alltaf í þessa sömu átt, með einni undantekningu.
Af þeim vörum sem fengust í Extra fyrir samruna hækka sumar verulega. Hamborgarar með brauði frá Norðlenska, Emmess trúðaís, Nesbú hamingjuegg, Kjötels pizzuskinka og Lorenz Nicnacs snakk hækkuðu í verði um meira en helming í Extra í júlí. Alls hækkaði verð á helmingi vara verslunarinnar. Einnig eru dæmi um verðlækkanir í versluninni en um fjórða hver vara lækkaði í verði, til dæmis lækkaði hálfs lítra BonAqua án bragðefna úr 249kr í 139kr, Myllu möffins úr 399kr í 259kr og danskt kartöflumjöl úr 499kr í 339kr. Hækkanirnar voru að meðaltali um 18% og lækkanirnar um 11%. Ítarlegri listi fylgir í lok fréttar.
Verðlag í Extra færist nær Kjörbúðinni
Í kjölfar framangreindra breytinga hefur verð Extra og Kjörbúðarinnar þjappast saman og úrvalið í þeim hefur orðið líkara. Helmingur vöruúrvals Extra er nú vörur sem finna má í Kjörbúðinni, en það hlutfall var undir 40% áður. Verðbilið milli verslananna, sem hefur sveiflast mikið síðustu misseri, er nú 0,0%.
Mestu hækkanir og lækkanir milli júní og júlí
