Meirihluti nefndar um launatöfluauka, sem skipuð er fulltrúum heildarsamtaka launafólks (BHM, KÍ, BSRB og ASÍ) og opinberra launagreiðenda (ríki, Samband íslenskra sveitarfélaga og Reykjavíkurborg), hefur komist að þeirri niðurstöðu að launatöfluauki virkjist í kjarasamningum sem ríkið hefur gert við stéttarfélög innan BHM og BSRB sem uppfylla forsendur. Launatöflur viðkomandi stéttarfélaga taka þannig breytingum þann 1. september 2025 sem sjá má í töflu að neðan.
Launatöflur annarra félaga breytast ekki.
| Launagreiðandi | Heildarsamtök | Hækkun launatöflu |
| Ríki | BHM | +1.24% |
| Ríki | BSRB | +0.75% |
Tilgangur launatöfluauka, sem er að finna í viðauka kjarasamninga stéttarfélaga við opinbera launagreiðendur, er að stuðla að því að þróun launakostnaðar starfsfólks á opinberum markaði innan vébanda heildarsamtaka haldi að jafnaði í við þróun launakostnaðar sambærilegra hópa á almennum markaði.
Samkvæmt fyrrnefndum viðauka er launatöfluauka ekki ætlað að tryggja þróun launakostnaðar einstakra
stéttarfélaga eða starfsmanna. Samanburðarhópar á almennum markaði eru tilgreindir með bálkum íslenskrar starfaflokkunar Hagstofu Íslands (ÍSTARF) á tilgreindu tímabili. Launatöfluauki hefur ekki áhrif á umsamdar launahækkanir í kjarasamningum.
Áhrif launabreytinga í tengslum við útfærslu 7. gr. samkomulags um breytingar á skipan lífeyrismála opinbers starfsfólks frá árinu 2016, hafa eftir atvikum ekki áhrif til lækkunar á launatöfluauka.
