Verð á matvöru hækkaði um 0,3% milli mánaða samkvæmt dagvöruvísitölu ASÍ. Hækkunartakturinn er minni en í upphafi árs en jafngildir þó um 3,7% árshækkun. Verðlagseftirlit ASÍ kannaði verð í 9 verslunum dagana 8-14. Júní en lesa má nánar um úttektina hér.
Sé þróunin skoðuð á ársgrundvelli vega þungt áhrif hækkana á kjötverði og mjólkurvörum. Verðhækkanir á kjötvörum eru breytilegar milli tegunda en mest hefur verð á svínakjöti hækkað (6,7% milli ára) auk lambakjöts (6,2%) og nautakjöts (5,5%).
Rúmlega fjórðungshækkun á nautakjöti yfir tveggja ára tímabil
Sé þróun á algengum vörum fyrir sumargrillveisluna skoðuð yfir tveggja ára tímabil má sjá að verð á kjötvörum, eggjum og mjólkurvörum hefur hækkað umtalsvert frá júní 2024 til júní 2026. Mest hefur verð á nautakjöti hækkað á tímabilinu, eða um 25,5%. Verð á svínakjöti hefur hækkað um 17% að meðaltali og lambakjöti um 16%, en hækkun á kjúklingakjöti hefur verið minni, eða um 9% að meðaltali. Verðið á bernaise sósunni hækkar einnig í verði yfir tímabilið sem rekja má bæði til verðhækkana á eggjum en einnig hefur verð á smjöri hækkað um 9,7% frá sumrinu 2024.
Sumargrillið hækkar umtalsvert í verði
Áhrif framangreindra verðhækkana má sjá í verðþróun á vinsælum grillvörum og kostar nú mun meira að halda grillveislu en áður. Verð á vinsælu grillkjöti líkt og lærissneiðum eða grísakótilettum er nú um 16-17% hærra en áður og hefur grillkjöt almennt hækkað umtalsvert frá sumrinu 2024. Að bjóða uppá grillaðar pylsur með öllu sem dæmi kostar að jafnaði 10,8% meira sumarið 2026 en sumarið 2024. Tilbúnar sósur og ýmsar aðrar vörur sem oft enda á grillborðinu hafa einnig tekið hækkunum, en þó sumar mun minna en aðrar. Sem dæmi má sjá að Gunnars piparrótarsósa hefur einungis hækkað um 6% í verði frá 2024 en SS pylsusinnepið um 17% frá 2024.
Samantektin sýnir því að heimili landsins þurfa nú að greiða töluvert meira fyrir sumargrillið en fyrir aðeins tveimur árum.
Um könnunina
Verð voru sótt úr úr nýjustu verðtöku ASÍ fyrir júní mánuð. Bornar eru saman sömu vörur milli ára hér er því aðeins um beinan verðsamanburð að ræða, en ekki er lagt mat á gæði eða þjónustu söluaðila.
Í verðsamanburði er miðað við hilluverð sem neytandi hefur upplýsingar um í versluninni. Þegar skýrt er gefið til kynna að veittur sé afsláttur/tilboðsverð af merktu verði við kassa var skráð afsláttarverð.
Öll verð ásamt nýjustu verðum geta neytendur nálgast í Nappinu eða á verdlagseftirlit.is
