Miðstjórn Alþýðusambands Íslands tekur undir stefnu nýkjörinnar ríkisstjórnar að fara vel með fé almennings, en leggur í því samhengi áherslu á mikilvægi þess að hugmyndir um hagræðingu í ríkisrekstri séu ræddar af ábyrgð og í samhengi við stefnumörkun í ríkisfjármálum, þar sem bæði er horft á tekju- og útgjaldahlið hins opinbera. Tillögurnar sem hópurinn leggur fram eru af ýmsu tagi en meðal þeirra er að finna tillögur sem snúa að hápólitískum viðfangsefnum, sem sum hver hafa verið sett fram af hálfu hagsmunaaðila og vandséð að þær þjóni boðuðum tilgangi. Þá eru margar tillögur lítt útfærðar, illa rökstuddar og forsendur um mat á sparnaði óljósar.
Meðal tillagna sem starfshópurinn setur fram eru hugmyndir um breytingar á lagaumhverfi vinnumarkaðarins, hlutverki ríkissáttasemjara og réttindum opinberra starfsmanna sem teknar eru beint úr smiðju samtaka atvinnurekenda. Miðstjórn mótmælir því harðlega að slíkar tillögur, sem ganga gegn hagsmunum og samningsrétti launafólks og eru í berhögg við ráðandi vinnumarkaðslíkan, séu settar fram í nafni hagræðingar í ríkisrekstri. Þá geldur miðstjórn varhug við tillögum um að leggja niður fyrirvaralaust lögbundnar stjórnir og ráð í stofnunum sem fara með mikilvæg réttindi og eftirlit með hagsmunum launafólks ss. Vinnumálastofnun og Vinnueftirlitið auk tillagna um einkavæðingu opinbers eftirlits. Mikilvægi hvers kyns eftirlits með öryggi og aðbúnaði vinnandi fólks hefur ítrekað sannað sig á undanförnum misserum. Miðstjórn mótmælir harðlega þeim vinnubrögðum að setja fram tillögur sem varða almannahag miklu, án allra greininga og hagsmunamats.
Þá er gagnrýnivert að í tillögunum er engin tilraun gerð til að draga fram byggðarsjónarmið og mismunandi áhrif þeirra á hinar dreifðu byggðir.
Miðstjórn kallar eftir vandaðri og ábyrgari vinnubrögðum af hálfu stjórnvalda og gerir kröfur um að tekin sé pólitísk ábyrgð á mikilvægum hagsmunamálum almennings.
