Ljóssmynd/Ed Wingate
Alþýðusamband Íslands gagnrýnir harðlega að í frumvarpi til laga um lagareldi sé ráðherra veitt víðtækt vald til að ákveða hvort og hvernig heimildir til fiskeldis verði boðnar út. Sambandið telur að skortur á skýrum reglum geti opnað fyrir geðþótta og skert gagnsæi í ákvarðanatöku.
Í umsögn ASÍ kemur fram að frumvarpið feli í sér að ráðherra geti metið, með tiltölulega opnum hætti, hvenær og með hvaða skilyrðum útboð fari fram. Slíkt svigrúm sé að mati sambandsins óeðlilega víðtækt í ljósi þess hversu miklir hagsmunir eru undir.
ASÍ bendir á að um sé að ræða aðgang að verðmætum og takmörkuðum auðlindum og því þurfi að tryggja að úthlutun byggist á skýrum, fyrirfram ákveðnum og gagnsæjum reglum. Ef slíkt vanti geti skapast hætta á mismunun eða ófyrirsjáanlegum ákvörðunum sem torveldi bæði fyrirtækjum og almenningi að treysta kerfinu.
Ráðherravald og geðþótti eykur pólitíska áhættu
Þá er einnig bent á að of mikið vald í höndum ráðherra geti aukið pólitíska áhættu í greininni. Fyrirtæki sem starfi í umhverfi þar sem stjórnvöld hafi mikið svigrúm til að breyta leikreglum eða ákveða úthlutanir kunni að telja rekstrarumhverfið óstöðugt.
ASÍ telur að tryggja þurfi skýra aðgreiningu milli stefnumótunar og framkvæmdar og að setja þurfi fastari ramma í lög um það hvernig útboð og úthlutun heimilda fari fram. Með því megi draga úr hættu á geðþótta og styrkja traust á stjórnsýslunni.
Sambandið leggur áherslu á að gagnsæi og fyrirsjáanleiki séu lykilforsendur þess að ný atvinnugrein geti byggst upp með heilbrigðum hætti og njóti trausts bæði almennings og fjárfesta.
Umsögn Alþýðusambandsins má nálgast hér.
