Verðlag á dagvöru hækkaði um 0,7% í febrúar frá fyrri mánuði samkvæmt dagvöruvísitölu ASÍ. Vísitalan skoðar þróun á vegnu meðalverði á dagvöru í öllum verslunum.
Sé Nettó undanskilið mælist ögn meiri hækkun á vísitölunni eða um 0,8%, en í Nettó voru afsláttardagar í byrjun síðasta mánaðar. Af öllum verslunum hækkaði verðlag mest í Iceland, sem tók stökk upp á við í febrúar og hækkaði um 10% frá fyrri mánuði.
Sé sérstaklega horft á lágvöruverslanir hefur verðlag hækkað um 1-2% frá desember, og má vænta að áramótahækkanir séu komnar fram að mestu. Verðlag í Krónunni hefur hækkað um 1,1%, í Nettó um 1,5%, í Prís um 1,6% og í Bónus um 1,8% frá desember. Þetta er stór hluti af árshækkun verslananna fjögurra, frá því kjarasamningar voru undirritaðir í mars í fyrra.
Verð enn lægst í Prís
Ekki hefur orðið breyting á röðun verslana. Prís er ódýrasta verslunin í reglulegu eftirliti Verðlagseftirlitsins og hefur verið það frá opnun. Að meðaltali hafa vörur í Bónus verið 4-5% dýrari en í Prís sérhvern mánuð frá opnun verslunarinnar. Verð í Krónunni eru nú 7% hærri en í Prís og í Nettó eru þau 13% hærri.
Súkkulaði, svínakjöt og fuglakjöt hækkar í verði
Sé litið á vöruflokka hækkaði verð á svínakjöti og fuglakjöti um 3% í bæði Bónus og Krónunni milli janúar og febrúar. Til dæmis hækkaði Ódýrt kjúklingalæri án mjaðmabeins í Krónunni úr 1.477kr/kg í 1.599kr/kg (8,3%). Ali kjúklingastrimlar hækkuðu í Bónus úr 1.087kr í 1.147kr (5,5%) og í Prís úr 989kr í 1.079kr (9,4%).
Súkkulaði hækkaði þó mest allra flokka, eða um það bil 4,5% í Bæði Bónus og Krónunni.
Miðað við fyrstu mælingar í mars hefur dagvöruvísitala verðlagseftirlitsins hækkað um rúmlega 0,4% frá febrúar, en um 0,3% sé Nettó undanskilð. Vöruflokkurinn súkkulaði leiðir hækkanir enn og aftur í bæði Bónus og Krónunni, bæði í febrúar og mars.
Fiskur hækkar einnig nokkuð í Bónus, eða um 2,7%, en aðeins um 0,24% í Krónunni. Til dæmis hækka bleikjuflök úr landeldi um tæp 6% í Bónus.
